"ვიღებ მაგალითს სხვა პატარძლების კეთილი საქმიდან და ვყიდი ალბათ, ყველაზე ძვირადღირებულ ნივთს, რაც გამაჩნია და მინდა, რომ სხვამაც ისეთივე ბედნიერებით ატაროს, როგორც მე სამი წლის წინ. მინდოდა ეს კაბა, მთელი ცხოვრება, ეგოისტურად კარადაში მქონოდა სამახსოვროდ, მაგრამ ამ ჩვეულებრივი კაბით, ანიტას დავეხმარებით და თუ მყიდველი წინააღმდეგი არ იქნება გაბრიელსაც გავუნაწილებთ. მარგალიტებითაა მთლიანად მოქარგული, საკუთარი ხელებით." - ეს პოსტი, მარიკა ჩაგანავამ, საქველმოქმედო ჯგუფში #ანიტასთვის რამდენიმე დღის წინ გამოაქვეყნა. ის ერთ-ერთი მათგანია, იმ პატარძლებიდან, რომლებმაც პატარების გადასარჩენად საკუთარი საქორწილო კაბები გამოიტანეს აუქციონებზე.
ანიტა და გაბრიელი მძიმე დაავადებას ებრძვიან, რომელთა სიცოცხლის გადასარჩენადაც, ადამიანები ძალებს არ იშურებენ: ყიდიან ძვირფას ნივთებს და წიგნებს, აგირავებენ და ყიდიან სახლებს, მართავენ საქველმოქმედო კონცერტებს. პატარები თავიანთ ყულაბებს ხსნიან, სკოლისთვის განკუთვნილი თანხიდან რიცხავენ ფულს ანიტას და გაბრიელისთვის. ანიტა და გაბრიელი ქვეყნის გამაერთიანებელ, ყველაზე კეთილ ძალებად მოგვევლინენ, რომლებმაც ჩვენში მიძინებული, თავდადებული სოლიდარობის გრძნობა გააღვიძეს.
საკო თოფჩიაშვილი ნანა მელქაძის სამ მოდელს ყიდის. ერთ-ერთი მოდელი საქორწილო კაბაა.
სამი წლის წინანდელი ქორწილიდან, სამახსოვროდ შენახულ ულამაზეს კაბას ყიდიან საბა პაპიძე და მისი მეუღლე. ფასი აქაც არ არის მითითებული და მყიდველს, თავისი სურვილის და შესაძლებლობისამებრ შეუძლია იყიდოს საქორწილო კაბა.
ყველა შეთავაზების ნახვა შეგიძლიათ ჯგუფებში #ანიტასთვის და #გაბრიელისთვის. სახელებსა და გვარებზე დაკლიკებით ნახავთ ინფორმაციას კონკრეტულ შეთავაზებებზე.
გარდა ამისა, საქორწილო თემატიკაზე, ყვავილების სალონი "ფანტაზია" 50%-იან ფასდაკლებას სთავაზობს ყველა პატარძალს, რომელიც მოისურვებს ქველმოქმედება გაიღოს #ანიტას და #გაბრიელის დასახმარებლად.
საქველმოქმედო ჯგუფები:
კომენტარები